日本靚女菜菜子同本地嘅鄭秀文（Sammi），都係MAXFACTOR喺兩地嘅代言人，佢哋主演嘅廣告通常都好唔同。但最近我羅拉發現菜菜子啱啱拍嘅全新唇膏廣告，居然翻炒Sammi用過嘅舊橋，重要遲咗成年，認真失威。
菜菜子啱啱拍嘅唇膏廣告，係講菜菜子同成班朋友一齊參加派對時又吃又喝，到有朋友大叫埋位影相嗰陣，全場靚女即時好狼狽咁攞支唇膏出嚟補妝，惟獨菜菜子最巴閉，即時可以笑晒影相，皆因佢係用咗隻唔甩色嘅唇膏。
大家聽落條橋同埋睇落啲場面，係咪覺得似曾相識呢？之唔係年頭Sammi拍過嗰個唇膏廣告囉。
以前菜菜子主演嘅化妝品廣告啲橋，點都會同香港明星代言嘅廣告唔同，賣嘅產品都會快過香港，但今次菜菜子竟然賣嘅係Sammi年頭已經sell緊嘅同一款唇膏，佢喺廣告度重做埋Sammi老翻，菜菜子知道後，唔知會唔會唔多高興呢？