如果將政制改革比喻為一道餸菜的話，香港人已經點好菜，就係要「○七年普選特首」，市民𠵱家坐定定、打開餐巾、攞起刀叉，萬一到時見到貨不對辦，即時會叫「回水」，唔知特首董建華點炮製呢味餸？
噚日港台節目《議事論事》請來不同黨派立法會議員扮成廚師，各自親手煮一款聖誕食物以比喻政改。
民主黨李華明做咗個鰻魚飯，寓意負責政改諮詢文件嘅林瑞麟動作太慢，又似一嚿飯；自由黨楊孝華做雜果沙律，雜果寓意政改之後都要保留不同專業利益嘅功能組別；建築測量界別嘅劉炳章就整咗士多啤梨果仁蛋糕，寓意政改要好似果實生長咁慢慢嚟；民建聯蔡素玉做雜果涼粉，寓意要聽各方意見。
另外多位議員亦代正忙於撰寫施政報告嘅特首，送一份聖誕禮物畀市民，自由黨田北俊送低脂蛋糕，職工盟李卓人即刻話，太低脂對被減薪嘅公務員冇益。
傳真︰2623-9278
電郵︰