日本少男組合w-inds前日喺橫濱一個由倉庫改建而成嘅廣場度，同fans提早慶祝聖誕節，今次佢地請咗二萬個fans入場，可以話係佢哋三個入行以嚟最大型嘅免費騷。當日重有香港代表向w-inds送上一萬封由本地fans寫畀偶像嘅信，相信三位美少男呢個聖誕一定好難忘！
其實今次係w-inds第三年搞呢類大型免費騷，能夠入場嘅fans都係買咗佢哋張新碟《w-inds~PRIMEOFLIFE~》參加抽獎嘅幸運兒。開騷當日，千葉涼平電咗個新髮型示人，佢哋三個出場嗰陣都忍唔住大叫：「好厲害呀！有咁多人嚟，MerryChristmas！」
呢日對本地嘅fans嚟講，亦都好有意義，因為佢哋寫畀w-inds傳達渴望偶像來港嘅信，終於直接交到偶像手上。本地fans認真有心，佢哋早幾日重去咗旺角影低w-inds嗰塊有成四層樓高嘅廣告板，重喺相度寫上祝福語寄畀偶像，你話w-inds點會唔冧呀！