馬德鐘同陳慧珊（Flora）喺啱啱播完嘅無綫劇《衝上雲霄》扮演夫婦，劇中馬德鐘意外身亡之後，陳慧珊先發覺原來最愛係亡夫，佢哋嘅演出好投入，重搞到傳出緋聞㖭！有雜誌影到馬德鐘、陳慧珊同監製潘嘉德等人日前約埋食飯睇《衝》劇大結局，之後重去咗中環消遣。
報道重話馬德鐘因為陳慧珊而拋妻棄子，老婆帶埋囝囝去咗歐洲住，馬德鐘噚日喺電話度話：「佢哋篇『作文』首尾呼應，我可以講嘅係呢件事唔會影響到我哋成家人嘅感情，相信Flora都唔會唔開心。其實我哋嗰日食完飯，我都係跟大隊落中環飲嘢，根本唔係我訂位。」
對於被指專登唔請吳鎮宇同胡杏兒去，馬德鐘話：「鎮宇都唔喺香港，拍完劇後，我哋做咗好朋友，差唔多每星期都約食飯，唔知下次會唔會傳我哋搞基？」我馮仁昭又覺得佢幾有創意噃！
馬德鐘表示太太張筱蘭喺歐洲做緊嘢，自己就負責照顧囝囝，佢話：「我前幾日已經送晒聖誕禮物畀老婆同囝囝。」佢咁有老婆心，馮仁昭都戥佢老婆心甜！
噚日平安夜，晨早就傳出話黃霑有不測，真係大吉利是！馮仁昭聽到呢個消息都嚇咗一跳，即刻四處打聽，原來係誤會一場。霑叔都算搞笑，知道俾人傳啲咁唔吉利嘅事後，即刻親筆寫咗張便條傳真嚟報館，寫住「祝讀者聖誕快樂、新年進步！」霑叔話咁樣就可以證明自己冇事，真係有幽默感。
梅艷芳助手Marianne、何韻詩同蘇永康等，噚晚去咗阿梅屋企食飯，大約八點鐘陸續離開。近日阿梅被傳抗癌治療出現後遺症同副作用，入住養和醫院。但噚日有周刊報道指阿梅曾入住瑪麗醫院，阿梅助手Marianne噚日喺電話度話：「我冇睇過報道，阿梅冇去過瑪麗，佢淨係去養和睇醫生。」
盧巧音前晚同歌迷坐電車預祝聖誕，盧巧音話會同班老友開派對及交換禮物慶祝，佢重話打算到性商店買禮物。馮仁昭好想睇吓，如果佢個緋聞男友蘇永康抽中份禮物，唔知會有乜反應呢？
王從希噚日扮性感聖誕女郎喺慈雲山中心行騷，提到同屆港姐水明璐嘅家姐水明琪，被傳搭上陳復生老公麥舜銘，王從希初時話感情嘅事最緊要開心，轉頭知人哋已婚就即刻轉口風話：「我都試過俾一、兩個已婚男士追，不過我唔會接受，連朋友都唔會做，因為一男一女好難做好朋友，費事關係曖昧啦。」王從希咁識揀男朋友，我馮仁昭祝佢早日搵到如意郎君啦！
