劉德華現正身在拉斯維加斯舉行巡迴演唱會，他表示因其胞弟在聖誕節當天出生，所以童年時每次慶祝弟弟生日便順道慶祝聖誕，故加倍開心。而談到印象最深刻的聖誕節時，華仔笑言有一年曾戴着超人面具坐地鐵，因沒被人認出來，令他感到十分自由。
劉德華早前在台灣出席完金馬獎頒獎禮後，翌日返港執拾行李便隨即飛往美加，展開其巡迴演唱會，所以今年聖誕節華仔要在拉斯維加斯度過。華仔日前接受訪問時，談到他童年過聖誕的回憶時，笑言當時過節的焦點，都會落在其弟身上，因為他的弟弟是聖誕節當天出生的。
華仔說：「我細佬係十二月二十五號生日，細個時人哋過聖誕節，我屋企嘅重點節目就係幫細佬慶祝生日。我細個時重諗，係咪阿媽聖誕時許咗個願，所以聖誕老人就送個細佬畀佢做禮物，每一年啲人講親送乜嘢聖誕禮物畀屋企人，我都諗，唔使啦，我屋企長年累月都有份禮物喺度，咪係我細佬囉！哈哈。」
問華仔為何覺得弟弟是母親的禮物，而沒有父親的份時，華仔說：「因為細佬似阿媽，都唔似老竇，我先似老竇嘛，人人都咁講㗎啦。」
不過，華仔表示長大後與弟弟各忙各的工作，已沒有在聖誕節當天特地為弟弟慶祝生日。
華仔說：「份聖誕禮物自己有節目啦！我反而記得有一年聖誕，嗰陣入咗行已經冇搭地鐵，我就戴住個超人面具同朋友一齊去搭地鐵，冇人理我，感覺好自由，但又好似去探險咁，幾好玩。我之後都想再試吓，如果農曆年我喺香港，或者會戴住個財神面具去搭地鐵或者巴士都唔定㗎。」
華仔今年在賭城過聖誕，但卻沒機會過一個白色聖誕，因為拉斯維加斯沒有下雪。華仔透露他從未試過白色聖誕，也不喜歡，他說：「我都唔鍾意雪，記得嗰年喺雪地拍《九二神雕俠侶——痴心情長劍》，曬到皮膚傷晒，所以唔係咁鍾意囉！」
此外，華仔因要舉行美加巡迴演唱而錯過日前的港台頒獎禮，他說：「本來我係今年四月做巡迴，嗰陣因為SARS停咗，咁𠵱家咪要做番囉。」但華仔表示他會趕在下周日返港，出席新城頒獎禮，翌日再到內地拍電影《十面埋伏》，然後再在無綫下月十日舉行頒獎禮時返港一天，因為華仔的《如果有一天》可望得「金曲金獎」，華仔說：「首歌咁多人識唱，我梗係有信心啦。」
採訪：蔡如育
攝影：林德雄
協力：羅慧敏