今年樓市上下半年嘅表現有天淵之別，美聯同中原都有今年地產大事選舉，美聯選出嘅十大事件，第一位係「沙士打擊樓市」，令物業買賣大減，九龍灣淘大花園更係重災區。𠵱家講起都有啲心寒。
第二位就係沙士過後「樓市全面復甦」，樓價大幅反彈。咁又難怪嘅，代理下半年收入大增，代理行重轉虧為盈，當然係大件事啦。
第三位係「鴻運地產結業」。鴻運地產有二十年歷史，係本港五大代理行之一，估唔到突然結業，加上當時樓市唔係咁好，對代理行業嚟講，都幾震驚，真係有雪上加霜之感。
另外，中原地產搞嘅網上「我最愛地產新聞」投票，最多人投嘅係「沙士後屋苑樓價反彈15%」，達23.13%，遙遙領先第二位得15.19%嘅「新盤削優惠加價潮」。
總之一句講晒，今年地產大事都係同沙士有關。
土地註冊處最近錄得一個中環中心成交，係七十九樓全層，成交價約一億二千五百萬。以中環中心一層約二萬五千方呎計，呎價約五千蚊。
呢個單位係由上市公司天時軟件持有，翻查公司註冊處資料，買家係TimelessLaboratories有限公司，董事為鄭健群同羅桂林，原來都係天時軟件嘅執行董事，咁即係內部轉讓，好似冇乜特別。
但係細心睇睇，呢層寫字樓喺○○年嘅買入價係一億七千八百萬，即係喺三年間，唔見咗約五千三百萬，接近三成。
噚日係平安夜，中原同利嘉閣都搞聖誕聯歡會，集團主席施永青坐鎮利嘉閣，而中原總部嘅聯歡會，就由董事總經理黃偉雄主持大局。
搞聯歡會，最開心嘅係有美食同有獎抽。一大堆禮物由中原嘅董事同非營業部主管送出，頭獎由黃偉雄送出，「上海灘」頸巾一條。另外，執行董事陳永傑就送數碼相機，禮物都相當重本，其他重有最實際嘅現金獎，總之要皆大歡喜。
中環一直被認為係甲級寫字樓重災區，但自從國際金融中心二期公布有個大客承租之後，市場已經完全唔同晒，不但租金止跌，租務市道重有起色㖭。
早一排，市場見國金二期有大量供應，租金一路跌，好多租客就算有需要都睇定啲先，有啲就左揀右揀，要有埋啱心水嘅裝修至肯租。到咗最近，租客嘅態度大變，聽講話連冇裝修嘅單位都吼。
雖然近期甲級商廈出租速度加快，但聽講有啲有意擴充嘅公司，因見嚟緊有幾個大節，所以諗住農曆新年後至再作打算。即係話，春節過後，又有一番新景象。
發展商大力催谷商場人流，向消費者招手，新地請嚟健力士世界紀錄大全跳繩保持者DavidFisher表演。
呢個「健力士跳繩大滙演」，有高難度花式表演，喺大埔超級城、柴灣新翠商場同元朗廣場有得睇。發展商希望可以令商場人流增加三成。
聽講DavidFisher曾喺前美國總統克林頓作御前表演。
蘭西
電郵地址：
