莫文蔚（Karen）一向喜以青春打扮示人，加上她擁有一雙四十二吋修長美腿，短褲和迷你裙便成為其穿衣的必然首選。出席隆重場合時，Karen當然會打扮得較淑女，散發成熟女性美的Chanel是其至愛之選，不過她會選擇款式較青春的短裙。
莫文蔚日前出席無綫《勁歌》季選時，穿上Chanel○四年春夏季的白色短裙套裝，配襯黑色小背心、紅色絲襪和黑色高跟鞋，最特別是外套的領口和袖口位以黑色和紅色綑邊，而裙襬部份又有喱士裝飾，將隆重的套裝加添調皮效果。
Karen說：「我有好多短裙，因為短裙可以凸顯腳嘅線條，好啱我，今年又好興喱士，性感得嚟不失隆重，又唔會過份暴露。我鍾意Chanel啲衫同裙設計簡單，剪裁好，啲料又用最好嘅，顏色唔係黑就係白，有斯文又有sporty，就咁加對紅絲襪，感覺喜氣洋洋好多。」Karen表示平日她選擇套裝時相當小心，最怕一些看來過份老成的套裝，不適合其年齡，會變得很「阿太」。
至於鞋子方面，Karen說：「其實除咗絲襪之外，高跟鞋都可以凸顯女性嘅線條美，咁啱今年興鮮色嘅襪褲，黑色漆皮高跟鞋係今年必備嘅鞋。」
