可能因為國際米蘭歇冬前最後一仗輸畀拉素，搞到球會高層唔多高興，下令要眾球員加操。首席訓練員巴方尼就度身訂做啲「家課」畀球員做，等佢哋度假都要保持良好狀態喎。
意甲聯歇冬期大約有兩個禮拜，但大部份國米球員（南美外援可以唞到新年）喺下周初就要歸隊復操，實際上假期得幾日。
據聞巴方尼喺球員放假前，已經交帶佢哋放假要喺自己屋企保持體鍛，歸隊後就會考核眾人狀態。啱啱做第二任老竇嘅列高巴就好生性，承諾返到老家烏拉圭一樣唔會掛住玩樂，一定操到最「弗」。即管睇吓國米球員放完假後，有幾多個交唔齊「功課」先。
應屆世界足球小姐佩蓮絲經過考慮後，決定拒絕意甲佩魯賈高薪挖角，成為第三個請佩魯賈會長加奧斯食檸檬嘅女足球星。其實佩魯賈由始至終擺明係出噱頭，試問外表成個精明學者嘅佩蓮絲又點會上當？佢話明知每場最多出幾分鐘，當然唔會有興趣。
羅馬球星中場托迪日前好唔畀面咁話，祖雲達斯嘅捷克球星尼維特唔配當選歐洲足球先生，因為後者踢嘅足球技藝性唔強，唔夠悅目，而佢自己終有望染指呢個獎喎。托迪不愧為球壇「劉華」，恨攞獎恨到發燒。托迪今年喺選舉度得三分，與其批評人不如加倍努力啦。
AC米蘭中場派路連續兩場波射失十二碼，備受壓力，不過佢就表示信心十足，話強如柏天尼同埋馬勒當拿當年都射失過十二碼，佢唔會因為接連失手而放棄。我求大俠覺得AC就以佢同舒夫真高射十二碼最好，如果佢以後唔操刀當然浪費，派路仔，AC球迷實撐你！
為解決傷兵問題，查爾頓領隊古比士利日前決定，召回外借至熱刺中場高捷斯基，應付聖誕節及新年檔期。我求大俠覺得呢件事都幾無稽，高捷斯基原本到一月中先至借用期滿，季初被借到熱刺，都因為古比士利唔鍾意佢，估唔到古比士利家陣要屈服要求球員救亡，都算冇面囉！