投資K今年已搵夠錢，提早放聖誕假，去完吉隆坡、檳城跟住去曼谷，最後一站會係布吉島，玩完之後就準備二○○四年搏殺，佢話所有分析師都睇好明年股市，佢要充足電，明年再搵過。
佢去到曼谷，見到股市暢旺，股市創下六年新高（七百零五點），路上交通非常擠塞，諗住無謂浪費時間，就在酒店餐廳一日三餐，猛咁睇當地報紙。投資K帶咗一份《星暹日報》畀左丁山，叫我留意副刊喎。泰國中文報紙有乜好睇呀？最好睇嘅就係華僑啲紅白二事、善堂總理嘅全版賀稿，啲擦鞋文字嘅娛樂性十分豐富。投資K送嚟嗰份《星暹日報》係十二月二十二日嘅，打開一睇副刊《人間》竟然有陶傑、李敏、周淑屏、李碧華加埋梁鳳儀與嚴沁小說，林光如與關愚謙嘅文章，作家陣容好鼎盛！
但回心一諗，泰國中文報紙點畀得起陶傑、李碧華、李敏嘅稿費呀？佢哋嘅稿似曾相識（例如陶傑篇《太早的懷舊》），應該喺《蘋果日報》名采版登過。未聽過肥佬黎將名采副刊版轉賣過畀泰國噃，但《星暹日報》照登可也，博肥佬黎唔告上法庭（哪個法庭？），總之辦報各有手法！
林光如喺《星暹日報》嘅嗰篇《吉善梳》，左丁山未睇過，但佢引述厲以寧嘅「佛寺賣梳」故事，幾有意思。如何到和尚寺賣梳得到大批定單，真係好有啟發性，證明推銷員只要有頭腦，和尚都會幫襯買梳！