【本報訊】警方出動飛虎隊生擒世紀賊王，整個過程比警匪片還精釆刺激，就算是凌晨時份發生，仍吸引到大批街坊及途經的市民圍觀；部份街坊甚至通宵留在封鎖線外看熱鬧。午間電視播出新聞後，街坊得悉是捉到頭號通緝犯，整個油麻地區，特別是「八文樓」頓然一片嘩然，街坊聚在一起議論紛紛，尤其是電器舖門前，圍觀電視新聞的街坊幾乎擠到水洩不通。以下是四位街坊對事件的反應。
住在賊王對面單位的周姑娘：「事發前幾分鐘，我開門出去倒垃圾後返屋企睇報紙，冇幾耐突然聽到砰一聲，嚇到即刻抱住個女開門想走，出到門口見到好多差人，係飛虎隊嚟㗎，差人喝我返入去，差人做緊嘢，我咪立即返入屋閂門囉，𠵱家知道係拉賊王，先至識驚。」
賊竇鄰屋的女住客盧姑娘：「佢哋搬嚟唔夠一個月，我只係見過一次，重同佢哋打過招呼話新搬來㗎。佢哋答話係呀。」得悉與賊王為鄰後，盧姑娘抹一把汗說：「好驚呀，分分鐘死咗都唔知發生乜嘢事；𠵱家差人捉咗佢，好似拆咗個炸彈咁，好放心囉。」
在賊竇大廈任看更的吳先生：「賊竇嗰個單位係由一對年約四十餘歲姓陳的夫婦租住，冇幾耐先再有一個男人搬入嚟。個疑犯外表好斯文，平時為人好低調，好少同人交談，同街坊見面都淨係微笑，所以佢哋嘅嘢好少人知。」吳生形容賊王個樣時說：「淨睇個樣唔多似大賊噃。」
曾為賊王換鎖的鎖匠棠叔：該單位姓陳的租戶是透過附近地產公司租下，月租五千元，早前租戶遺失鎖匙找他換鎖，開鎖及換鎖共收四百元。
棠叔形容疑人時說：「佢外表好斯文，又幾好傾，完全唔似大賊，今日睇新聞先知道原來咁大劑。」
