噚日平安夜，八方一返到公司就收到涂謹申嘅澄清聲明，指某刊物冇問過佢，就屈佢喺本月上旬，去歐洲議會人權會議，唱衰香港大半個月，實情梗係完全唔係呢回事。
八方早前都寫過，阿涂今次係應歐盟嘅邀請去歐洲訪問，內容圍繞保安範疇，例如反恐、監獄、走私等，阿涂好勞氣咁喺電話再三澄清，從冇參加乜嘢人權會議，只係曾經同歐盟官員討論過治安問題，以及旁聽歐洲議會。
當然阿涂最唔明點解個記者唔向佢求證。八方知道，由於阿涂覺得今次出訪屬學習性質，所以好低調，既無發表演講，亦無接受當地記者採訪，何來唱衰？佢早前重興致勃勃同八方講佢喺布魯塞爾遇上大罷工，地鐵、巴士響應，搞到佢差啲去唔到警察總部訪問，好彩佢醒，識得搵香港辦事處嘅人幫手，搵車車佢，先至冇失場。
傳真︰2623-9278
電郵︰