雖然只得半日市，好友仍盡力希望將大市推高至12500收市，但事與願違，最終收報12456，升36點，成交82.19億元，單是中國人壽（2628）、中銀香港（2388）同紫金（2899）就佔去總成交30％比重，而且成交高度集中在國企與藍籌身上，反映好多二三線股已經提早收爐。
其實自從市場興起炒新股熱潮後，二三線股早被冷落，不過仍有部份股仔喺度靜靜地起革命，其中富豪（078）噚日炒高7.14％，且並非乾炒，成交達2210萬元，有傳聞話今次唔係炒佢出售酒店資產，而是有中資炒佢落後。黑客話，雖然富豪旗下酒店獲投資者出價洽購，不過羅生仍想吊高嚟賣，富豪海灣豪宅賣得好，或者唔會再賣酒店資產。
不過黑客話，若想炒仙股博股價倍升，一定要留意下隻廣益（530），因為此股剛剛變相「賣殼」。呢間公司早前宣布１供１，每股供１仙，但供股獲不足額認購，結果包銷商將11.28億股賣咗畀郭應良，相當於擴大後股本14.13％，因而成為廣益大股東。若果新股東有意搞好間公司，自然可改善公司前景，就算只係無心插柳做咗大股東，都要諗計點甩身，相信好大機會要等股價炒高後才可全身而退。
國壽噚日升9.43％至5.80元，但高位見高盛狂沽，狀似大戶出貨，相信當下月6日正式做咗大摩指成份股後，此股升勢將告一段落，甚至要調整一吓，話晒明年有唔少國內金融股供應。
阿 虎