小初噚日講到中國數碼信息（250）會開車，原本擔心會好似以前咁，講親股價就會跌，點知今次又唔係，隻股果真發力向上，半日市都升咗11.11％，收0.24元，原來已經係52周新高。
由於隻股噚日嘅成交量有成1.22億股，金額2792萬元咁多，實在令小初非常好奇，諗緊係咩人馬在炒作。
經紀陳就話，基本上今次炒作中國數碼信息嘅炒家，都係以往的原班人馬，但最重要就係有條大陸水撐住，先至會咁熱鬧，江湖傳聞目標價更係天咁高，真係唔知信好定唔信好。
至於究竟炒咩？佢話稍後就會有下文。
另外，經紀陳又提及一隻超級冷門的創業板股EVI教育（8090），真係嚇咗小初一跳，雖然隻股噚日升咗11.54％，收0.058元，但以10萬大銀成交金額嚟睇，並唔見得係咩大茶飯。
經紀陳就話，皆因隻股背後有一財技高手睇住，據講有人成日想做番起隻股，所以日後再有異動，佢唔會感到驚訝。
慕容小初