亞洲遊戲展2003昨日正式開鑼，呢個香港Game壇一年一度嘅盛事，首日已吸引大量機迷到場，未開Show喺會展出面已經排晒長龍，機迷更係通宵輪候。今年SCEH有價值百萬港元嘅《GT4》體感車艙，及動感十足嘅EYETOY坐鎮，加上多間大廠力撐，新加入手機、玩具等展區，令香港GameShow唔比東京遊戲展輸蝕。
記者：副刊IT組
攝影：梁細權
亞洲遊戲展2003
日期：12月24日（三）至12月28日（日）
時間：10:00am至8:00pm
地點：灣仔會議展覽中心新翼Hall2
票價：港幣$25
呢個亞洲遊戲展2003由噚日嘅12月24日開始揭幕，至到12月28日星期日為止，場內有大量新Game任試任玩、兼且齊集多位靚靚ShowGirl及Cosplay人物，氣氛夠晒熱鬧，最啱三五知己或一家大細嚟玩，開開心心過聖誕。
雖然亞洲遊戲展有多個精采環節，不過現場所見，機迷一入場館，第一時間被一個蛋形車艙所吸引。呢個《GT4》體感車艙專程由日本運過嚟，價值過百萬港元，全球只得兩部，識貨嘅機迷當然唔會錯過呢個機會。筆者實地試玩過，一上車迎面有三個大電視，闊屏幕感受無與倫比；揀好車同賽道後正式開波，雄渾引擎聲伴隨體感車艙嘅震動，鬥車Feel已經爆晒燈，再揸落去真係唔得了，車艙擺動簡直跟真車無異，十足十玩緊冬季嘉年華嘅機動遊戲一樣，筆者大力推介！
（PS2?展區編號：B01）
SCEH另一個主力谷嘅大GameEYETOY，起咗個舞台俾人玩。不過唔知係咪機迷怕醜定係體感車艙太吸引，唔少機迷起初都只留喺台下試玩，但係最後都經唔起EYETOY嘅引誘，齊齊走到台上跳番PartEYETOY舞！
唔少機迷都一早知道SCEH搞咗間嚇人鬼屋，除咗有最新《紅葉：紅之蝶》、《BIOHAZARD:OUTBREAK》等，亦可玩到重未曝光中文版《SIREN》同《九怨》，重搵咗專人扮鬼嚇人，咁搞鬼嘅節目當然係機迷必玩，入到裏面只有電視畫面，可謂伸手不見五指，重見到豬頭鬼喺度「騷擾」玩家，自問夠膽嘅玩家都爭住入場挑戰！
GameShow反應熱烈就預咗，其中喺SCEH嘅《GT4：Prologue》更係機迷必爭之地，GameShow11點鐘準時開Show，機迷都齊齊湧到，事關除咗GT體感車艙到場之外，更放咗4組《GT4：Prologue》嘅試玩車架，雖然玩落冇體感車艙咁過癮，不過機迷當然都唔會執輸，一樣要大排長龍先有得玩。
唔少玩家入場最希望都係試玩新Game，其中人氣最旺都要數《鬼武者3》，之前只有少數傳媒試玩過，所以今次吸引唔少金城武兼《鬼武者》Fans；另外重有新Game《FinalFantasyX-2》、《Nebula》、《TimeCrisis3》及中文版《忍~Kunoichi》等，全部未見街，機迷當然把握機會率先試玩。
白色產品喺聖誕節特別有吸引力，今次喺AGS賣嘅限量陶瓷白PS2，唔少人都一早昅實，因為即場購買會多隻GT手表同紀念品，比街舖着數得多！
今屆AGS唔單止有傳統遊戲商參展，就連手機商Nokia都有擺攤位，重頭戲就當然係旗下狂Sell打機嘅N-Gage。而Nokia亦趁機擺出多款新遊戲畀人試玩，其中最重頭力作就係《FIFA2004》，全部按照真實球隊、球員名字製造，整體表現絕對中上，球員細微動作如舉手慶祝、扭身等都交足功課，而且流暢度亦相當高，唔會窒吓窒吓，一氣呵成跑到去底線都冇問題。
到場者更可參加「FIFA大賽」，只要喺5分鐘內入最多波，就有機會獲得N-Gage。Nokia更展出首個中文N-Gage遊戲《RequiemofHell》，類似《Diablo》玩法嘅角色扮演遊戲，全中文對答顯示更加有親切感，唔使成日喺度估估吓！不過會場展出嘅係簡體中文版，相信在港推出會有繁體中文版。
往年AGS只有Game獨沽一味，今年新加咗「動漫組別」，多咗好多遊戲及漫畫人物玩具銷售；雖然舖位唔算多，只有三兩個，但全部做減價！兼有絕版嘢買，都值得留意！
呢隻紫龍Figure出面街舖極缺貨，有價都冇貨；瑞華行今次擺Show有大量供貨，都係照價$300，必搶！
（瑞華?展區編號：L03）
那邊廂打緊《ZGundam》蘋果盃，這邊就有PG版ZGundam（$1,040）同最新GP01（$1,300）模型賣，以行貨嚟計，價錢比出面一般舖頭平咗好多！
（瑞華?展區編號：L03）
𠵱家電視正做緊《ASTROBOY》卡通，這邊馬上亦有玩具賣！3呎高——電動遙控ASTROBOY，叫價$149，比出面街價差唔多平咗$100，好抵玩！
（新華?展區編號：K27）
每次會展有大型展覽，都會有人通宵排隊，今次AGS都唔例外；霸頭位嘅梁氏二人組，前一晚9點已經開始排隊，佢哋所要買嘅係《古龍群俠傳：幽靈山莊》嘅特別月費包（$168），因為有特別模擬「便利客棧」送，出面Game舖又要排又要抽，都未必買到！
（GameOne?展區編號：H02）
想執平嘢留意，年代數碼嗰邊隻《TheLordofTheRings》勁減到$10！好多人入得AGS都人手一隻；PC版、遊戲性同畫面都非常正，冇理由唔執番隻做「手信」啫！
（年代?展區編號：E03、K30）
