聖誕佳節，普天同慶，放眼國際，侯賽因落網、卡達菲投誠，邪惡軸心開始瓦解，美國國力更加強大，世界和平，更有希望！
不過，喺香港及鄰近國家，今年聖誕節，氣氛相當詭異。中聯辦秘書長蔡小洪接受英國招聘，化身為皇家特務，做咗占士邦嘅遠東契弟，現正接受審查。另外台灣四十幾名地下人員，亦喺中國一網打盡。今年聖誕，不愧係一個「無間聖誕」，諜海茫茫，望唔見終極。
更為怪異嘅，就係一向親中愛國嘅民建聯，竟然遭到本地土共喉舌攻擊。某大共報執八方口水尾，指控民建聯「逢特必反」。並升格為社論嘅高層次攻擊，聲稱民建聯倒戈一擊，附和民主派搞政制改革圓桌會議，又迫到教統局撤回大學撥款方案，「令人感到意外以至吃驚」。
共報使國家銀，民建聯亦係由國家睇，大家飲同一隻奶水，因何由互啜共存，搞到今日互踩反目？
八方中環某法律界精英老死，平時睇開好多間諜小說，近日警告八方：土共嚙咬民建聯，有可能係合演苦肉計。由共報執鞭，加大力度鞭撻民建聯，再由民建聯赤裸地發出痛苦嘅呻吟聲，雙方搞性虐待聖誕party，博取港人同情，明年九月，爭取選票，最緊要制住民主派唔好超過三十席，合作成功之後，雙方再用同一條鞭，代為《基本法》23條立法，齊齊再重重鞭向民主派及香港人。
同樣理論，亦可以解釋利比亞恐怖大王卡達菲。卡達菲見到美國咁狼，為保存實力，不吃眼前虧，假意向布殊輸誠，實質係時間換取空間，卧薪嘗膽。
嘩，咁陰謀？精英老友話：八方你係香港人，天真無邪，唔知道政治可以蠱惑到乜嘢地步。連阿董都有可能係英美卧底，一招「八萬五」同香港經濟風光大葬，做到咗英美列強想發生而未夠時間做嘅事，又有乜嘢係冇可能？
所以今年聖誕夠詭異，就係咁解，鱷魚蒲頭，再潛水失蹤，船街鬼屋，猛鬼出柙，大賊落網，好多嘢都好反常，連賭王何都加入反董，話阿董信錯咗一個人，先至搞出一鋪「八萬五」。賭王重學咗國家領導人語言藝術，狂讚何厚鏵叻仔，又話澳門回歸後成功，因為何厚鏵係土生土長嘅澳門人。換言之，上海佬阿董，坐艇落香港，有如陳水扁話齋，國民黨係一個外來政權。賭王八十幾歲，難得重咁有智慧。可見聖誕社會氣氛，亦唔反常得晒。八方祝各位聖誕快樂！
傳真︰2623-9278
電郵︰