八方噚日收到一份可以話係今年收過最令人開心嘅聖誕禮物，外形係一個藍色紙盒，一打開，香噴噴嘅咖啡撲鼻而嚟，入面有一張張「快樂卡」，原來係八方前行家老友鄧明儀，同最講健康生活嘅周兆祥，合作出版嘅新「書」《甚麼是快樂》。
鄧明儀繼上次訪問名人為香港找尋出路之後，今次再訪問二十四位名人講快樂心得。
其中廖秀冬相信凡事只要樂觀面對、盡力而為，即使最後輸咗，唔快樂都會好快過去；佢講到以前同家人生離死別，又講到同蕭炯柱離婚，到𠵱家最簡單嘅快樂就係下廚，而幫襯多年嘅街市更係佢嘅快樂園。
飛哥就話自己𠵱家冇權冇勢，暢所欲言，又有真心朋友分享喜怒哀樂，真係最快樂。看透人生嘅畫家阿虫就話，如果要「追求」快樂，往往係自尋煩惱，其實當我哋冇感到唔快樂嘅時候，就已經係快樂。盒內面重有范徐麗泰、任達華、施永青、陳也等人嘅快樂故事。
傳真︰2623-9278
電郵︰