又到聖誕前夕。今年港股大升，大家都搵到錢，特別係呢一兩個月，幾隻中資股上市，齊齊向股民送大禮，好似噚日嗰隻紫金礦業（2899），更威蓋同儕，以都算幾高價的4.7元開出後，重扶搖直上，最高去到5.95元，比上市價3.3元高出80%，尾市雖回番多少，但仍高企5.7元，高出招股價72.7%，中籤者賺到笑，而中國人壽（2628）衝勁亦好凌厲，收5.3元，再升5%。
港股市值大升，到今年10月底，已達52272億元，比去年底升44.7%，當時恒指12190，以指數及近個多月國企表現咁勁，估計年底市值可達54500億元，扣除今年首次公開招股及上市公司發行新股的集資額約2100億元，再與去年底的36117億元比較，實際增加的市值達16283億元，以本港約200萬個家庭計，平均每個家庭的財富增加80萬元。
股民賺錢，有多有少，最重要係以前揸落嘅蟹貨，特別係國企，唔單止鬆綁，重賺到筆大錢，總算鬆番一口氣。港股03年轉運，04年肯定係另一個好時年，唔睇得太遠，單係第1季，港股會繼續上上上，個別股票更加升到你唔信。今晚平安夜，大家開心，不妨飲多兩杯，迎接更美好的一年。
今年以來，三四線股有好多升幅已唔細，但仍有唔少寶藏，尚待發掘，相信呢批寶藏，明年將會大發光芒，今日先介紹一隻，就係永成化工（850）。先睇走勢，永成喺低位整固，已成10個多月，低位0.17元，高位0.34元，近日升勢再起，一衝破0.34元的三頂阻力，第一站係0.5元。
永成主要係產銷油漆、混合溶劑、塑料色劑同化工原料貿易，睇番業績，04年度（3月年結）的上半年，雖然備受國際油價大幅飆升及沙士影響，仍錄得盈利924萬元，下跌53.7%，但比上年度下半年的虧損245萬元，已有大幅改善，每股盈利2.3仙，派中期息0.5仙，派息比率22%。公司預計，下半年度業績會較佳，估計全年盈利上升到2200萬元，每股盈利5.4仙，PE只為6.3倍。
永成發行只4.08億股，市值僅1.34億元，「晒士」細，可塑性甚高，大股東持68.19%，街外流通貨值只得4200萬元。
郭兆誠