無綫劇集《皆大歡喜》的一班演員薛家燕（好姨）、林文龍、趙學而、廖碧兒、謝天華、陳彥行（行姐）噚日喺將軍澳廣播城度開Party，成班金家人喺派對上大玩小朋友遊戲「爭櫈仔」。成班演員一見到行姐着咗件桃紅色冷衫鬼火咁靚，就即刻夾計，諗住迫到佢冇櫈坐，實行要搞到行姐接受大懲罰，諗住將佢綁實，淨係畀佢用個口叼嘢食！
不過好可惜，好姨、學而同謝天華嘅奸計唔得逞，重要俾人玩番轉頭，結果三個人都要受到大懲罰，好姨要同謝天華食埋一條蛋卷，重好唔覺意咀咗一啖，即時引起哄動，班人大叫：「嘩！掂到嘴，會生ＢＢ！」
成個攝影廠嘅人，都忍唔住即刻笑咗出嚟，全場充滿熱鬧氣氛。不過，好姨同天華就應該唔會尷尬嘅，因為佢哋唔過電嘛。
早年趙薇因為着日本軍旗服裝影相而引起軒然大波，搞到俾人淋屎，不過一樣冇影響佢同日本人嘅合作，好似最近佢為日本著名化妝品牌資生堂旗下嘅Aupres系列做代言人，噚日佢重應客戶要求喺北京着到紅噹噹咁出席㖭。趙薇話有好多人搵佢做化妝品代言人，但佢最後揀咗自己最鍾意嗰隻，咁識講嘢，難怪𠱁得啲日本人咁開心啦。
陳慧琳（Kelly）喺港台頒獎禮只係攞咗一個獎，原本佢噚日應該到電台接受訪問，但記者去到先知取消咗，主持人周國豐話：「本來噚日朝都話會嚟，但夜晚就改咗。Kelly唱片公司轉述佢經理人鍾珍，話唔想咁多是非。」馮仁昭心諗今年第一個頒獎禮已經咁多是非，嚟緊咁多頒獎禮，唔知會點收科？
無綫職員凍薪已經凍咗超過兩年，直至噚日上晝佢哋班員工又再收到管理層通知，話今年無綫因為沙士影響業績，未來一年所有人又要繼續凍薪。另外，無綫人事及行政部總監陳偉鏗亦會喺二月十一號離職，至於助理總經理黃應士今年底將會退休，但佢會幫新聞部做顧問做到三月底先至離開無綫。
翁紅喺美國結完婚後，𠵱家重留喺嗰度蜜月緊，不過佢喺香港渣甸山嘉雲臺嘅千六呎單位終於甩手，早兩日以一千一百五十萬賣咗呢個單位，九六年翁紅用一千二百八十八萬買呢間屋，𠵱家甩手，帳面就蝕咗約一百三十萬，但比起其他人，蝕呢個數目已經算少喇！
