流動通訊：燦爛燈飾隨時影<br>測試至Hit影相手機

流動通訊：燦爛燈飾隨時影
測試至Hit影相手機

以前影燈飾嘅都係拎住部菲林儍瓜機，上兩年就係數碼相機，而今年輪到影相手機發威，皆因現時市面擁有30萬像素嘅影相手機俯拾皆是。不過部部都話自己影相點得點得，一於趁住聖誕，搵3部至Hit影相手機，嚟個聖誕燈飾大測試！

記者：劉耀祥
攝影：林栢鈞　ImageGirl：Winnie

雖然現時市面上主流影相手機款式多多，不過大部份都離唔開10萬像素或30萬像素影相鏡頭，論質素計，當然以30萬像素較為優勝。而今次測試就全部用上30萬像素影相手機，分別係Nokia6600、SharpGX22及LGG7100，淨係鏡頭擺位已經各有不同，有放喺前、有放喺後，甚至放喺左手邊，實力似乎各有千秋，究竟歐、日、韓邊隻手機影香港聖誕燈飾先至最靚？

鬥外景
GX22顏色搶鏡
話明影聖誕燈飾，當然要搵個大大塊又搶眼嘅燈飾做背景。既要影人影得靚，又要背景影得清，的確可以考驗到手機嘅影相功力。而當中以GX22稍勝一籌，人像主體清楚之餘，顏色亦較為自然，最緊要就係背景都清清楚楚，燈飾顏色還原度相當高，而且光度都係啱啱好，唔會話曝晒光，搞到睇燈飾變咗睇煙花，成個燈飾曝到一嚿嚿。

SharpGX22
$4,380

LGG7100
$3,588

Nokia6600
$3,588

鬥室內
6600平均自然
近年聖誕節個個都覺得燈飾愈嚟愈差，相反各大型商場嘅聖誕裝飾一年比一年好睇，規模重愈嚟愈大，所以今次就試試3部手機室內嘅影相能力。而結果就係今次GX22嘅表現未及之前戶外影燈飾咁突出，相反之前顏色偏淡嘅Nokia6600今次表現就較為優勝，人物面部夠光，背景各個BearBear熊公仔都睇得清楚，令成張相表現都較為平均。

■G7100：整張相都有偏藍現象，除人像清楚之外，背景燈飾都較為模糊，未能清楚顯示。

■6600：成張相顏色都較淡，顏色表現能力唔算強。而清晰度只係中規中矩，不過喺手機睇效果絕對合格。

■GX22：搶眼嘅顏色令到成張相當堂唔同晒，各種顏色都非常「出」。而且人物主體同背景燈飾都相當清晰，效果突出。

鬥大「睇」
G7100放大至清
手機影相當然儲存至手機記憶體或者記憶卡，不過記憶體有限，所有影完嘅相最終歸宿都係屋企部電腦，所以電腦效果就相當重要。雖然3部機同樣都係30萬像素，解像度有640×480，不過過番入電腦睇，以7100效果最為理想，放大後清晰度依然健在，未有因為拉大而走樣。但係若果想經MMSSend張相畀朋友，7100就只支援50K以下相片，較為不便。

■G7100：整體感覺較為自然，人物主體清晰可見，光暗位都可清楚還原，不過背景就略為鬆散，睇唔清楚。

■6600：未有內置閃光燈仍令人物主體光度足夠，而身後的公仔亦都一清二楚，現場感覺濃厚。

■GX22：雖然開着內置閃光燈，不過似乎主體唔係太「食」光，令到主體較黑，顏色亦不及室外濃厚。

■6600：放大之後微粒較粗，顏色亦不及手機中濃厚，手機中可清楚顯示之內容亦變得模糊。

■GX22：同樣經放大之後，以640×480解像度睇番，都係稍為矇鬆，與手機超靚顯示稍有出入。

■G7100：就算用640×480睇，7100之相片仍然清晰，人物細緻位都一樣睇得到，微粒相對少得多。

手機影燈飾小貼士
1.夜間模式：部份手機會內置夜間模式，作用將快門時間減慢，令相片更光亮，所以拍攝時最好將手機盡量穩定，或挨牆影，減少「手震」效果。
2.閃光燈：內置有閃光燈可於室內拍攝作小量補光用途，所以於室內拍攝應盡可能開啟閃光功能。
3.現場光源：使用沒有內置閃光燈的手機影相，應注意光源，避免背光或將頭垂下，令人物變「黑面神」。

4.保持靜止：由於晚間光度較弱，手機拍攝時須將快門時間延長，所以被拍攝主體於拍攝時不宜不停移動，應盡量保持靜止。