昨日掛牌的紫金礦業（2899）果真一如所料氣勢如虹，最高見過5.95元，收5.70元，比起招股價3.30元，高出成72.73％，有幸抽到貨的散戶，真係可以過一個快樂聖誕。
前日經紀陳叫人唔好咁快沽貨，小初的朋友依計行事，終於睇住隻股一浪高於一浪，但今日問番經紀陳點睇，佢就話唔識睇，皆因買盤實在勁到不得了，遠高於佢預期，尤其係成交股數高達4.1億股，金額有成21.5億元，好明顯已經由市場力量主導，而唔係炒家話事。簡單講，佢覺得賺夠就沽咯。
另外，本來小初又想講隻中國數碼信息（250），但就有朋友勸阻，佢哋話次次小初寫親呢隻股，股價當日都會下跌，唔提佢就好地地，似乎同小初八字唔多夾，所以叫小初唔好阻住人哋發財。
查實小初都係抱住有料同大家分享的心態而已，本月初都提過呢隻股嘅炒家又有水到，直到上周中國數碼信息公布業績，盈利勁升後，隻股似乎先至真係開車。
中國數碼信息噚日升8％，收0.216元，成交股數有成1.23億股，金額2556.7萬元。
慕容小初