美聯物業黃老闆收購香港置業幾年，終於苦盡甘來，今年開始有錢賺。為咗代表港置已經長大，識照顧自己，要離開美聯環球大廈嘅懷抱，港置將總部遷去中區美國銀行中心，噚日搞咗個簡單而隆重嘅入伙酒會，唔少發展商代表雖然事務繁忙，仍抽時間出席恭賀一番。
新地周國賢去深灣軒記招之前先去道賀、信和韓家輝就搞完蔚藍灣畔記招後趕嚟、新世界黃浩賢同長實梁焯鏗搞完傲雲峰遊船河後，上岸未企穩腳亦飛奔而至。
其他重有置地黎漢群、九建羅汝榮、恒基張炳強、九倉梁秉權、新地蘇仲強同新世界何伍燕榆等。難怪美聯集團主席黃建業咁開心，佢重估計明年樓市會好暢旺。而港置胡日發話，明年會多開二十間分行，增加三百人嚟迎接旺市。
發展商夥拍地產代理一年都開唔少記者會，每次都會影番幾張靚相。中原同新世界何伍燕榆合作無間，自然有唔少珍藏。噚日新世界頒發全年銷售大獎，中原集齊何太今年出席記者會所影嘅相，整咗本純影集送畀佢。
何太好開心咁話，自己都冇儲起咁多相，就算開記者會，都係靠秘書幫佢剪低啲剪報，所以一次過收到咁多相，相當驚喜。佢自己最鍾意封面張相，夠晒明豔照人。至於影集入面咁多張相，佢最鍾意係賣帝后華庭時出席中原開舖嗰張，又有舞獅又有對聯，夠熱鬧，印象最深刻。
利嘉閣話今年截至本月十九號，全港共錄得五百六十宗摸貨成交，比舊年少約兩成七，總值九億三千七百萬，跌三成六。
摸貨成交少咗，該行估計可能係啲投機者，將手上嘅貨改為長線持有，因為咁樣賺得更多。
喺呢類買賣中，旺角同深水埗兩個舊區嘅成交都唔少，總共佔三十八宗，樓齡都係三十年以上嘅唐樓。
大屋苑就來來去去都係天水圍嘉湖山莊、沙田第一城、紅磡黃埔花園，同荔枝角美孚新邨呢啲大家熟悉嘅屋苑。估唔到少人提及嘅荃灣海濱花園，都係當炒屋苑。
蘭西聽街坊講，海濱花園一直有班炒家盤踞，一見有筍盤就掃，加上𠵱家重有啲低過一百萬嘅放盤，所以有唔少摸貨成交。
由六大影帝主演嘅電影《無間道Ⅲ終極無間》，香港已經上映緊，麗豐控股喺廣州嘅東風廣場，都嚟湊熱鬧，今個月三十一號，喺屋苑嘅會所舉辦「終極無間/東風廣場除夕倒數豪情迎04」活動。點解會同無間道有關？原來當晚現場會播放呢套電影嘅粵語版。
蘭西都收到請柬，打開裏面重有埋電影嘅幾個主角嘅相。不過，大會要求嘉賓以黑、白色盛裝出席，可能係要配合當晚嘅主題。
蘭西
電郵地址：
