今日係平安夜，先預祝各位MerryChristmas。好似我羅拉咁多瓣數嘅讀者，𠵱家係咪好煩咁諗緊今晚去邊個party呢？橫掂都未諗到，不如睇吓成班偶像金喜善、張東健、一班尊尼仔同安倍麻美等點過聖誕啦！
身為唔少亞洲少女頭號整容模仿對象嘅金喜善，今年又戴到周身鑽飾去威，未搵到男友嘅佢，重拖埋型男張東健現身，肯定照晒成個場啦！不過睇真啲，其實佢兩個只不過係拍緊MiniGold首飾聖誕廣告，現實中金喜善話有假期都只會留喺屋企，唔同人迫，而張東健重慘，早排佢拍戲整親條腰，聖誕要留喺醫院同護士一齊過！
安倍麻美今年啱啱出道，就惹埋唔少負面新聞，所以佢話今年聖誕要乖啲，唔係返鄉下北海道，就會同fans一齊度過。不過麻美接受雜誌訪問時，透露以前聖誕節收過前度情人送畀佢嘅CD，見佢咁回味，應該唔會係有份賣麻美啲舊相到雜誌嘅舊情人啩？
三個尊尼仔JimmyMackey、東新良和同風間俊介，一邊布置聖誕樹，一邊發白日夢，Jimmy話：「最好個女仔五點鐘準時到我屋企，我哋一齊睇電視同食火雞！」而風間就話：「我哋一齊出街睇愛情片，個女仔着住白長褸，肯定令我心跳！」至於東新又點呢？佢話：「最好就係我做完嘢返屋企，個女仔布置好晒畀驚喜我！」佢哋三個都好純情啫！
李孝利同權相祐呢一對，好似金喜善同張東健咁走埋一齊擺個咁冧嘅樣，梗係叫大家消費救市啦！如果各位買唔起金喜善啲貴價鑽飾，買李孝利做代言人嘅底褲都幾好㗎，夠香豔嘛！