天寒地凍鍾意通街行，尤其係喺夜晚與老朋友一起行，行行、談談、逛逛，金鐘行到中環，成身乾乾爽爽冇滴汗，碰上雪糕車買個甜筒，冷在口裏暖在心。
幾個不太美的日本美少女遊客，擘大個口得個窿地擔高頭望實滙豐銀行大廈。
「Whatisthis?」日本少女問。
「It'sabank.」為了推動香港旅遊業，立即撚靚把聲，答得又誠懇又親切。
「Wah...It'ssobig!」，餘下時間義務充當攝影師，替日本少女大拍沙龍。
香港的大廈確是獨步天下，又靚、又多、又密，各有不同性格，幢幢都獨當一面，長江大廈最老實，四四方方一碌咁，有穩重的感覺；中銀大廈夠殺氣，尤其係喺好天氣嘅日子用低角度欣賞，一把菜刀加一對筷子直插入雲，藍天白雲與大廈融成一體，高手即是高手；滙豐大廈最有童心，據聞係一嚿嚿好似積木咁砌成，若然香港有咩事發生，可以一嚿嚿拆番開走人，不過當然唔望有咁嘅一日。
今年滙豐嘅生意應該唔錯，因為非常揼本攪節日燈光，成幢滙豐大廈用了不同顏色燈光，非常Cyber，每隔一陣重會轉色兼「眨」燈，很有Fing頭場Feel。
在寒冷的冬天拖着愛人溫暖的手，行吓中環，睇吓燈飾，如果女朋友唔鬧咁凍帶佢出嚟做乜，咁都應該幾溫馨。
祝大家有一個充滿愛的聖誕。