是日恒指高低波幅129點，唔算厲害，收市跌幅67點，唔算多。國企指數亦跌些少，國企股則榮辱不一，電力股比較醒神。
華能（902）收12.45元，升30仙，最高12.65元，見歷史新高。鎖定回報Call輪9080成交只係得6萬份易手，輪價38.5仙，升20%，做咗第三大威水輪。非正規輪，成交少，普羅股民冇貨，就算點升都冇乜人有着數。
正路貨色係標準輪9918，大成交，37球易手，收34.5仙，升幅7.8%，明年7月到期，溢價4%，槓桿率3.6倍，數據適中，但買唔買都冇乜所謂，贏輸機會一半一半。埋年結之後，正股做完櫥窗裝飾，驚住有回吐。
中銀（2388）前日升完35仙，昨日再升25仙。大股東做「披成」，市場流通量增加，同指數掛鈎嘅基金要按比例買番啲，造成貨源需求增加。估計中銀重會上多些少，執啲Call輪有機會搵啖食。正路對象係9218，貪佢槓桿率唔細，當然要畀較高溢價。呢件交投暢旺，要止蝕散水都快過打針。
裕元（551）收21.75元，升30仙。Call輪9878收2.6仙，升44%。隻輪得番幾日玩，溢價1.8%，槓桿率83.7倍，結局係可以升一倍半倍，但變作廢紙嘅機會一樣咁大。
章 盛