城中有林風眠晚年畫作展覽，聽講大部份係林大師居於太古城時期嘅作品。醫生C收藏字畫多年，間中亦去蘇富比拍賣會觀摩，對林大師及其他畫家作品，知得遠遠比左丁山之流清楚。
問醫生C：「有冇去林風眠畫展，有無可觀之作？」醫生C答：「匆忙去過一次啦，只能講有一個大體印象。林大師啲畫甚為值錢，畫主收埋咁多，總值幾可觀㗎。」
問畫作，佢只講價錢！可見名畫鑑賞與名畫估值，只有一線之隔，香港人睇畫兼睇埋價錢，乃合乎香港人本性，唔講嗰個先至係異品。據醫生C講，私人珍藏突然公開展覽，必有所圖，即係向世人表示呢啲珍藏會intheplay，投資銀行家講乜乜公司intheplay，即係指公司可以成為收購對象，待善價而沽。至於intheplay嘅時間有幾耐，就要等機緣，睇有冇人肯出價咯，但無論如何，只要公司表示有此意圖，眾人就會喺門口排隊，介紹對象。
醫生C講：「一旦公開展覽，拍賣公司或其他收藏家就會心中有個譜，知道名畫嘅分佈，預先估計價錢，睇中合意嘅，就會主動出擊，引物主出售，好快就會神女有意，襄王有夢。老實講，完全唔想賣畫嘅人，唔係幾想示眾嘅。」醫生C對名畫買賣程序，經驗豐富，聽佢之言，對林風眠大師有興趣之人，不妨留意。