好耐冇見水貨大亨「袁仁祥」，星期一突然來電，問有冇相熟保險經紀介紹？原來祥哥間舖最近被保險公司勁加保費。都只怪祥哥祥嫂兩夫妻愛高調，經常博自己間舖啲新貨見報，適逢今季日本牌子出親啲新貨，唔係皮褸就係用特別物料製造，每件褸都六、七千蚊起，甚至過萬亦等閒。祥哥每逢返新貨，祥嫂就發奪命追魂Call廣邀記者雜誌報紙記者上門採訪，每次一見報，引來嘅唔止裏原宿Fans，連高買集團都爭相上門「光顧」。咁搞法，保險公司有乜辦法唔加保費？保險公司要求祥哥加強防盜設施，祥哥立即加隻防盜電眼，點知又被銅鑼灣分店兩小花投訴老闆侵犯私隱。祥哥只歎做生意真艱難，生意稍為好番啲，又遇上咁多棘手問題。佢重話，銅鑼灣業主見佢間舖𠵱家啲貨咁好價，重想乘機加租㖭。睇嚟祥哥祥嫂係時候學吓低調先得喇。
主持人：大食Jack
八卦熱報：