臨近長假期，唔少芬佬都放晒假，港股在缺乏資金入市下出現高開低收走勢，收報12420，跌67點，成交不足152億元。Cookie話市場主要擔心美股可能都會在聖誕假前出現基金出貨套利情況，所以港股投資者先行出貨。
紫金（2899）掛牌最高見過5.95元，表現比預期好好多，對於抽到嘅股民嚟講，實在係一份聖誕禮物。紫金全日收5.70元，高出招股價72％，公司是次發行3.483億股，但噚日就有成4.1億股易手，成交金額達21.5億元，似乎散戶手上的貨源已被基金吸得七七八八，雖然話紫金PE已達20倍，比國際金礦股都高，但在貨源歸邊加上紫金搵來南非GoldField入股兼來港打氣，亦吸引咗唔少外資基金望多兩眼，黑客話今次紫金有權再挾高至6元水平。
漢基控股（412）又學人投資澳門賭業，入股海王會20％股權，但股價卻出現先升後跌，收報0.127元，跌14.2％，成交達982萬元。以往每逢有入股澳門賭業消息，都必有一番炒作，不過家陣市場焦點在中字派身上，而且市場對於無直接持牌的澳門賭業概念開始不感興趣，都係等日後澳娛或呂志和旗下賭業直接上市時至再炒過。
華燊燃氣（8035）遭到證監會調查，搞到連配股都要擱置，而呢兩日亦出現基金洗倉情況，復牌至今股價已跌30％，成交激增。若果一旦查出有問題，重可能累埋其他民企街坊，投資緊民企嘅股民可能都要小心啲。
阿 虎