國際足協由元旦日開始，批准一啲只係踢過二十一歲以下國際賽，而又符合踢其他國家隊（大國腳）嘅球員「轉籍」。新例推出後，應該會少咗啲年少時揀錯國家隊，「嫁錯郎」而恨錯難返嘅個案，有得take2；同時惹來國家隊「挖角潮」，隨時熱鬧過轉會市場。
非洲國家盃即將舉行，非洲國家將會係新例最早受惠者，例如踢過法國二十一歲以下代表隊嘅熱刺簡路迪，名正言順有權揀踢馬里；踢過英格蘭二十一歲以下代表隊嘅紐卡素前鋒阿美奧比，亦有資格轉為尼日利亞大國腳。
至於擁有歐洲國家血裔嘅巴西、阿根廷小國腳，極可能成為西班牙、意大利同葡萄牙等國家嘅挖角對象。各國統帥以後要同其他人鬥快「揀蟀」，又要忙多瓣。
《法國足球》雜誌噚日凌晨公布歐洲足球先生得主，但其實有啲媒體已一早漏風聲，例如祖雲達斯官方網意大利文版早喺前晚十一點幾率先披露尼維特攞獎，重即刻列出以前佢哋有咩名將得過呢個獎，消息快外國通訊社成個鐘咁滯。成日上祖記官網嘅網友肯定快人一步囉。
有報道指意甲烏甸尼斯、幾間法國及德國球會，都準備簽入比甲比華倫嘅Y杜里，即係今屆表現飛躍嘅阿仙奴後衞杜里個細佬。但我求大俠就希望比華倫再等吓先，事關阿仙奴早陣子宣布，領隊雲格即將喺一月轉會市場重開時有錢用，不妨賣去阿仙奴，組成「杜里兄弟兵」。
雖然要到二月尾至同曼聯喺歐冠盃鍊過，但係波圖教頭摩連奴原來禮拜日已經走去睇曼聯作客贏熱刺嘅比賽，真係做足功課，抵波圖喺葡超遙遙領前；不過佢亦可能因為睇到今屆過檔熱刺嘅普斯迪加好唔掂，搞到有啲唔開心，話晒呢個後生仔都係佢帶出嚟，都唔想佢衰㗎，係咪？
前NBA籃板王洛文正式東山復出，不過唔係打NBA，而係加入小聯盟ABA嘅LongBeachJam。四十二歲嘅洛文自爆話佢嘅最終目標係要打番NBA，𠵱家打ABA只係想盡快操弗啲體能。我求大俠雖然唔係咁睇好洛文嘅前景，但佢總算毅力可嘉，希望佢得償所願喇！