港台的「十大中文金曲頒獎禮」雖已曲終人散，但餘波未了，先後有歌手不滿賽果。身為樂壇校長的譚詠麟（阿倫）昨日談及此事時，不禁表示歌手應該自我反省。而港台亦稱頒獎禮不是派對，並不是逢到有獎。
譚詠麟和李克勤昨日到港台接受周國豐主持的《娛樂滿天星》訪問，對於不少歌手對「十大中文金曲頒獎禮」賽果感不滿意，而莫文蔚（Karen）日前還表示浪費時間，而許志安則自覺成績不俗卻食白果，並自爆頒獎禮前一小時接到通知沒獎，故此不出席。
阿倫對此說：「其實李再唐都講得啱，歌手應該多啲參與頒獎禮，應該要反省吓，唔好成日顧往海外（市場）同室內（留在家中）。」而克勤一直沒有插嘴，表現頗尷尬，他只說：「其實每個人睇法都唔同，我畀唔到任何意見。」
對於頒獎禮不斷被炮轟，頒獎禮監製周國豐昨日強調說：「我要重申頒獎禮唔係party，唔係聖誕節，我相信Karen出席台灣金曲獎時都唔知佢會有獎㗎，冇人話過出現就會有獎攞，如果要做到有出席就有獎，sorry囉，我哋做唔到。我哋唔會事前講個賽果出來，所以如果歌手冇信心或者有事出席唔到，我哋唔會勉強。」
周國豐強調港台絕不會有黑名單，他又透露正東曾向他們了解過為何成績如此差，他說：「我哋其實唔介意畀啲分數唱片公司睇，如果有需要嘅話。」阿倫在旁即搭嘴笑說：「如果係咁咪打電話畀安仔對質囉，但我覺得Karen可能詐嬌啫，佢應該唔會咁樣講嘢嘅。」
採訪、攝影：胡比
