樸茨茅夫日前淨吞修咸頓三蛋，立即引來大地震，除賠上聯賽三分之外，球員更加無埋個聖誕節假期，都咪話唔慘。
聯賽盃時吞咗修頓兩蛋後，估唔到「老樸」重要比嗰場波輸多一球，領隊哈利列納賽後大發雷霆，重點名責怪後衞施夫高域，係球場上好似發緊夢，結果俾柏夏斯射入第二球，導致無得追和。佢重即時下令今個星期開始球員每日都要練波，聖誕節當日都要。
我求大俠就覺得哈利列納加操行動正確，「老樸」𠵱家跌落尾三，甚至俾列斯過頭到尾二；哈利列納曾經教過韋斯咸，知道如果聖誕節檔期唔可以搶分，擺脫榜尾位置，下半季就要專心護級，足總盃都唔使爭，冇假放都無可厚非，班球員要知驚呀。
修咸頓贏咗南部大戰後，升上第四位，但領隊史特根好有自知之明，無諗要參加下屆歐冠盃。我求大俠都明白佢講法，佢唔想加重球員壓力，話晒今季英超第四位爭奪戰非常激烈，通常上到第四位後就頻頻輸波，坐唔穩，何況修頓「拆禮物日」就對住第五位嘅富咸，點話得埋！
非洲國家盃下個月展開，近期不斷傳出英超領隊同國家隊爭球員，而有資格代表馬里出賽既熱刺法國射手簡路迪亦係其中一人。早前已傳過馬里會搵佢，估唔到初選名單真係有佢份。不過，唔好話我求大俠潑冷水，以熱刺暫代領隊柏列特咁重用佢，又點會放佢走，倒自己米？
國際米蘭喺禮拜尾場被拉素反勝，關鍵當然係艾美達下半場中段被趕出場。呢位阿根廷哥仔唔知係咪食錯藥，踢低哥拉迪攞黃牌後，重想追打人。球證出示紅牌趕佢出場，佢重惡到搶走張紅牌。佢早排講過對足球意興闌珊，踢埋今季可能收山，理應無欲無求，搞咩咁火爆呀？
有睇前晚AC米蘭主場輸畀烏甸場波嘅波友，應該留意到AC兩大主將舒夫真高同埋施多夫都缺陣。前者因為賽前患感冒唔出得，但施多夫無傷無病連後備都無份幾意外。據講因為佢響洲際盃輸波後埋怨隊友，所以被雪藏，今年佢表現差，𠵱家又衰多口，呢一雪唔知雪幾耐嘞。