蝦碌頻頻重好睇
王菲甩毛又甩裙歌迷話可愛

王菲前晚在紅館舉行第二場演唱會，頻頻蝦碌，台上的小螢幕無故失靈，阿菲頭飾上的羽毛又不慎掉落，就連她穿的舞衣鈕扣亦鬆開，令她相當狼狽，阿菲雖不滿演出，但歌迷仍十分熱烈，還讚她可愛。

王菲前晚演出第二場個唱，意外頻生，她出場後不久，高跟鞋頭飾上的長羽毛突然掉落，阿菲企圖將之放回頭上，但未成功，她惟有拿着羽毛作狀指揮，然後邊唱邊指揮樂隊，現場歌迷即大叫：「阿菲你好可愛。」

螢光幕失靈喊驚
當阿菲穿着一件粉紅色舞衣出場時，用作扣緊上下兩截輕紗的腰封扣又忽然鬆脫，她狼狽地用手按着鬆扣位置，唱完一曲後，有工作人員上台欲為她扣回，但當時現場大燈開着，阿菲見狀大叫：「吓？你喺呢度幫我整？」大會才即時關燈。
雖然阿菲身上的問題解決，但就輪到周邊環境出事，台上瀑布因水壓問題停水、提示阿菲演唱程序的電腦螢光幕突然失靈，阿菲又再大叫：「我睇唔到螢光幕呀，下一首係乜呀？我好驚呀…」幸好螢光幕很快便恢復操作。

眼部化妝重線條
之後阿菲的耳機又失靈，影響演唱的效果，阿菲說：「今晚大家覺得點？我覺得唔係幾好，不過𠵱家都冇辦法補救，真係唔好意思，如果大家可以再嚟睇多次就好啦。」現場歌迷即報以熱烈掌聲作鼓勵。
此外，阿菲今次個唱主題是「菲比尋常」，其御用化妝師Zing為配合演唱會主題，將阿菲的化妝圍繞於時空交錯之間，他說：「今次阿菲嘅妝，大家一眼就係睇到對眼，呢對六吋乘三吋大嘅眼睛，靈感係來自日本卡通片主角。」
阿Zing續說：「但係阿菲今次嘅歌衫已經夠晒高貴華麗，因為要配合番佢音樂上迷幻同punk嘅元素，我就將眼嘅化妝加強線條感，用線條同顏色去帶出一份視覺效果，帶出一份trashy嘅感覺。」