聖誕檔期一到，新機湧住咁出，高檔有高檔鬥，入門有入門爭，總之就鬥得不亦樂乎。喺咁多新機之中，以索記部Z200暫時帶出半個馬頭，外形靚仔兼且大把殼換，已經吸引到唔少男男女女用家。不過好賣嘅原因就係索記重搵埋隻老鼠仔嚟幫手，成套米奇老鼠殼、機繩連機座咁送埋，淨係個盒都成兩個鞋盒咁大，叫人點忍得手。手機舖老闆重話有好多係一PairPair咁入嚟買，畀錢嘅當然係男方，睇嚟呢招卡通豪裝的確有唔少威力！
等咗咁耐，西門子嘅潮機Xelibri終於都有新機派貨落場，不過可能趕住喺聖誕前出貨，等大家可以換新機過聖誕，4款之中暫時只得X5同X6有貨，即係好似背囊扣同化妝盒嗰兩款。𠵱家場中X5就嗌緊$1,580，X6就做緊$2,480，不過羅新基行多幾間，發覺價錢上落都好大，X5有啲舖嗌到去$1,380都有交易，相差成$200，X6重厲害，$2,080就已經可以行出門口，差成$400，所以有心買就記得行多幾間格吓價。