港股連跌3日後，又連升3日，恒指重上12500水平，噚日收12487，升116點，成交147億元，期指尾市轉弱，低水9點。今個月，剩番幾個交易日，市場已開始有假期氣氛，芬佬認為短期會係牛皮整固之局，到1月才發動大攻勢。
中國人壽（2628）僅消化1日，又再大升，輕風送爽般就衝破5元大關，高收5.05元，升9.7%，成交5.36億股，基金同大行繼續密密收集，睇勢重有得去。近期新股熱到爆燈，認購動輒超額幾百倍，申請者唔算太「好肉」，但在上市後吼位低吸者，就真係賺到笑。
4隻新股中，以噚日收市價同發售價比較，最「好肉」係中航科工（2357），升咗70.8%，人保財險（2328）升41.3%，國壽升40.6%，長城汽車（2333）升幅最小，只得27.8%。紫金礦業（2399）今日上市，勢會掀起另一個熱浪，今次申請獲配之數細眉細眼，得啖笑，不如用番嗰招，吼位低吸，揸番幾日，肯定賺得重多。
噚日恒指升過百點，主要係郁咗滙豐（005）、中移動（941）同中銀（香港）（2388），呢3隻大藍籌，筆者都一路看好，滙豐目標價135元，中移動27元，中銀明年中可見19元。國企指數亦上升，高收4639，升115點，資源股仍最勁，中國鋁業（2600）高收5.85元，大升7.3%，江西銅（358）同馬鋼（323）亦分別有5.3%及4.7%進帳。
安徽海螺（914）高收10.25元，升1.4%，呢隻股早幾日升到上11.45元後震倉，落到9.35元先回升，聽芬佬講，倉已震完，今次再升應該無驚無險，去到12元。
第4季水泥價格持續上升，業界預期趨勢可維持一兩年，對海螺非常有利。公司現時年生產能力2000萬噸，上月配股集資，將用作興建新廠房，完成後每年生產量可增加600萬噸，未來兩三年，盈利可保持高增長。
海螺配股後，基金繼續增持，澳洲CWBank買多195萬股，令持股量上升到6.11%；CapitalGroup買多163萬股，持股量上升到7.04%，而摩根大通亦增持到5.25%。未來幾個月，仍然係基金股世界，揸海螺，等收割可也。
郭兆誠