如果你有留意開車壇動態的話，相信都會知道唔少關於瑞典紳寶汽車，將於未來幾年推出多個新型號嘅消息；其中與日本富士車廠合作研製，並以富士Impreza作設計平台嘅9-2X，將於明年年中率先推出。
以年輕人為主要目標嘅9-2X，除以近年流行嘅五門Wagon旅行車形象示人外，賣相又見獨特吸引；其中一對頗神氣頭燈襯以全新設計嘅鬼面罩，望落要比現有其他紳寶車系來得突出吸引㖭！
車廂布局亦予人耳目一新之感，空間寬敞闊落、座椅配搭多變唔在講，重有全新設計嘅中控台，有齊原廠冷氣及高級音響等配備。不過，最吸引嘅相信會係新車嘅引擎配搭，除備有Linear版所配用嘅2.5公升自然吸氣水平對向四汽缸偈（馬力165匹）外，頂級Aero版更以一台2.0公升水平對向四汽缸Turbo偈作核心，不但馬力輸出達227匹，高達30.0kgm扭力峯值，更喺引擎處於4000rpm時發出，加上有一套恒式四驅系統輔助，性能表現毋庸置疑。
