香港人六年幾以來，受盡上海佬折磨，但有人話，香港想重新建立身份，惟有靠潮州佬。
唔經唔覺，原來潮州佬喺呢十年來，上位超勁。《茶杯》今期以「新潮人」做封面主題，所謂「新潮人」，即是「新一代潮州人」咁解。今時今日，潮州兒女已經盤踞珠三角政治、經濟、文化嘅各座橋頭堡，《茶杯》封面，就係將億萬富豪李嘉誠，同埋演藝界嘅黃耀明、鄭秀文、楊千嬅等，炒埋一碟。老李重着住件淺色樽領冷衫，同班演藝人一襯，當堂young晒，呢招形象「建構學」，班高官真係要學一學吓。
不只係咁，連潮州佬廣東省前省長盧瑞華，都着套單吊西作頑童狀，十分配合當前「三個代表論」。李嘉誠基金會原來要搞一個「新潮文化再生行動工程」，大量培養有國際視野、思想開放嘅文化精英上位。
上海佬做特首，香港人見過鬼怕黑，香港下屆嘅特首，由潮州佬做會唔會好啲呢？
《茶杯》勁擦潮州佬鞋，睇怕係人都知點解，而八方嘅潮州同事就好有同感，猛話「唔敢當、唔敢當」。
（圖）將李超人拍埋啲後生潮人都幾有腦，但盧瑞華同林順潮就做咗大配角。又，點解千嬅（後排右五）咁細粒嘅？
盧瑞華（後排左一）、林順潮（後排左二）
傳真︰2623-9278
電郵︰