保險K搵咗餐廳老闆M，問佢如果夥計要求賠償貼士，如何計數。老闆M為之苦笑：「唔識計，間間酒樓茶室餐廳都用唔同方法處理貼士，我住得『背』，從來冇聽過有甚麼會計準則、貼士指引。其實人客簽加一小帳，我哋就有數得計，現金貼士囉喎，真係唔知有幾多。我亦唔想知，唔使管理人員知——主要係為咗MPF問題，驚住萬一有人要將貼士計入月薪之內，我就要代佢哋供多一啲強積金！」
老闆M間餐廳將人客畀嘅現金貼士全部放入一個錢箱內，每星期日朝頭早就由夥計代表打開，喺所有有份分貼士嘅夥計面前數銀紙，然後攤分，佢哋每人分得幾多，老闆M從不過問；呢班夥計有冇報稅嗰陣加埋貼士上去呢？騎騎，稅務局有冇收到呢？
所以囉喎，如果有勞資糾紛，勞工處點樣裁定「貼士賠償」呢？任夥計噏？對老闆好唔公道。問老闆？一定話冇。做審裁員嗰位仁兄仁姐唔通拋銀仔去決定，隨便作一個數？老闆M對保險K講：「假如有夥計告我，向我追討貼士，我一定賠，但係要照稅單賠。如果佢老實到將貼士報入薪俸稅，我一定賠㗎。如果佢冇嘅話，點賠呀？不如話佢每年有貼士十幾萬吖？」保險K為之擰擰頭，遣散餐廳夥計，如果計算薪酬時，要包埋現金貼士在內，糾紛必多，以後審死官。用稅單嚟計數，最為公道！