肥彭做咗英國牛津大學校監，早前佢喺自己讀書嘅貝利奧學院接受邵新明訪問，內容呢幾日喺《信報》刊登，張敏儀重請纓幫手做攝記。
呢位末代港督看世界，當然比老董同班土共高好多皮，佢由歐盟嘅角色同地位講起，講到英國應否採用歐元。喺呢個問題上，肥彭態度明確，就係採用對英國有利，但按慣例，英國最終都會加入歐洲大家庭，只係往往太遲。
講到中國，肥彭最沾沾自喜，因為當年佢被中國辱罵為「千古罪人」，但後來竟然獲北京邀請去中央黨校演講。肥彭話佢相信北京領導層比香港批評佢嘅人實事求是同成熟，又知道佢唔係中國嘅敵人；佢重自爆，身為歐盟專員，寫咗唔少受中國歡迎嘅策略報告，同中國亦簽咗好多有用協議，批評大陸人權同法治不足，都係為中國同全世界好啫，胡溫心中最有數。
肥彭對中國咁樂觀，記者就挑戰佢話歷史上冇一黨專政嘅政黨甘心放棄權力，但係肥彭話有，八十年代墨西哥嘅機構革命黨就試過同意舉行自由選舉。
肥彭始終博學，好難夠佢講。
傳真︰2623-9278
電郵︰