我大口羅拉成日覺得做藝人真係唔易，好多時為咗工作，身體有事都要頂硬上。
好似日本偶像組合KinKiKids嘅成員堂本剛咁，早排被指呼吸系統有毛病，我大口羅拉就親眼喺KinKiKids嘅演唱會ＶＣＤ入面，睇到佢好辛苦咁頂硬上唱歌，咁有專業精神，難怪啲fans咁支持佢！
好多KinKiKids嘅fans都一定擔心過堂本剛嘅身體，早排尊尼事務所嘅官方手機網頁入面，堂本剛都承認自己的確有病，令佢經常感到不安、緊張同有壓力，佢亦好坦白咁話影響咗自己喺演唱會上嘅表現。
KinKiKids早排喺日本舉行完大型個唱《Domefconcert~FunFanForever~》，香港版ＶＣＤ啱啱出咗，喺個騷入面，阿剛唱到中場嗰陣，一度顯得有啲辛苦，唱唱吓都要扶住條欄唞氣，不過，睇見佢重好用力咁喺個騷入面同拍檔堂本光一又唱又跳足成三十首歌，重唔見有走音，錫阿剛嘅fans一定覺得好鬼佩服佢。