小初食火鍋時聽番嚟嘅創維數碼（751），噚日公布中期業績雖然好靚仔，但偏偏股價就唔得，收市反而跌咗4.1％，收1.99元，成交股數重有成4635.6萬股，金額成9530萬元咁多。
經紀黃歎完口氣就話，一係投資者趁好消息出貨，再唔係就係芬佬睇到橫掂都升咗咁多，不如趁年尾埋單計數都未定。
總之小初條氣就唔順，有咩理由創維截至今年9月止中期業績，賺成8088.7萬元，比舊年多成262％，股價都要倒跌先？
都係唔講唔開心嘅嘢，講番今日嘅焦點，必然係上市前傳聞多多嘅紫金（2899），終於在今日開始掛牌買賣，成為今年最後1隻上市的新股，以隻股獲744倍認購，兼夾散戶分得咁少，就知道紫金有幾熱賣。
雖然唔使多講，紫金理論上今日將會高開，但問題係有幸抽到的應該拿拿臨獲利鬆人，定係再坐一會？經紀陳就話，佢知道有班大陸炒家同埋芬佬準備繼續炒落去，所以未必需要好似長城汽車（2333）咁快沽貨。
慕容小初