樓市復甦，連帶冷門嘅投資物業地廠都出現高價成交，中原工商部總經理黃應年話，自從自由行落實之後，零售同旅遊業一片興旺，商舖成交激增，呎價飆升，獨具慧眼嘅投資者轉移投資價錢較平嘅工業區地廠，呎價重愈做愈高。
坐落九龍灣常悅道一幢工廈嘅單邊地廠，喺正十字路口兼面向行人天橋，人流非常暢旺，由於位置相當優越，畀資深嘅商舖投資者睇中，雖然面積只有五百呎，喺十月時以高價四百萬連租約買入，呎價同中半山豪宅不相伯仲，每呎盛惠八千蚊，比附近地廠高一倍。呢個地廠以月租三萬三千蚊計，租金回報率有十厘。
呢個單位最近續租時，投資者重大幅加租近三成，呎租八十五蚊，比附近租金高出一倍有多，回報率提升至接近十三厘，現時以呎價一萬蚊放緊盤。
中原之所以咁清楚，原來佢哋嘅工商部咁啱就係呢個地廠嘅租客。
佳節臨近，發展商同代理都把握時機，搞應節優惠。美聯物業就同長實嘅長沙灣宇晴軒搞咗個「美味濃晴軒全城」優惠，下個月十號前，頭八位經美聯買宇晴軒加推單位買家，每名買家享有一萬蚊佳節到會服務，總值八萬元。
為獎勵美聯物業促成該盤大單位有理想表現，長實高級營業經理郭子威噚日親自下廚，示範整「班戟」。點解要整「班戟」，原來係寓意成班代理係超班精英，幾有意思。
郭子威話，成個盤賣咗七百幾伙，有十五億進帳。第三座會喺聖誕節後加價百分之五至一成。
中環國際金融中心二期啱啱落成，發展商之一嘅新地已經不斷出招催谷，𠵱家趁聖誕節宣傳個商場，日前安排咗一千二百個新地會會員同家屬，參觀重未開放嘅國金商場平台花園，又舉辦咗填色比賽，冠軍係圖中呢位小朋友嘞，手上嘅熊仔就係獎品。另外，發商展又安排新地會會員睇以「雪國傳說」做主題嘅百老滙式表演，相當熱鬧。
有舖王之稱嘅「波叔」鄧成波，近期買賣舖位好活躍，不過就賣多過買。聽講佢啱啱又賣出咗一件貨，係灣仔莊士敦道一百零八號全幢，成交價三千七百八十七萬，賺幾百萬。
中原助理董事鄭琪俊話，呢幢物業五層高，總樓面五千五百方呎，地下及一樓舖位有租客，上面嘅住宅交吉，𠵱家全幢月租二十二萬，計落回報率有七厘。
波叔呢排頻頻出貨，都有錢賺；聽講佢手上嘅貨，只要價錢啱，都會出售。
要入市買樓，大多數人都會左計右計，考慮好多因素先做決定。年輕嘅，大多數為了想住新樓而搬去其他區域，不過，上年紀嘅準買家，因為唔想重新適應新嘅居住環境，情願搵舊樓，都唔想遷出本區，所以舊區住宅都有一班捧場客。
蘭西聽聞，有啲舊區業主打算換樓，搵來搵去都唔啱心水，搞咗一大輪，最後搵到嘅，竟然係自己住緊嗰座大廈嘅單位。
蘭西
電郵地址：