香港真過癮，無端端會變得天寒地凍，雖然凍到極都係十度咁大把，但嗰種凍同寒風又真係好刺骨，企喺街頭，大風一吹，全街市民一齊凍到「口雪口雪」聲，貨真價實「口雪口雪凍」。
我好喜歡冰冷的香港，街上的人穿得特別骨子，任何人多穿一件外套都會格外醒目，冷帽、頸巾搭搭湊湊，大家出門口前多了一個「襯衫」的節目。女士們更是傾巢而出，將平時買埋買埋，厚到冇乜可能着上身重型裝束盡情展示，橙溝綠、米襯藍，套套惹火搶眼。
我好喜歡冰冷的香港，可以在室外打邊爐，一個黑草羊煲，兩啖落肚，當堂成身暖晒。煲仔飯及煲仔菜亦我所欲也，一煲臘味飯加一個啫啫雞煲，豐富過鮑參翅肚多多聲。唔好忘記「涮羊肉」，一家人或一枱好友圍住個傳統炭爐係咁食，一大叠羊肉淥熟然後放入自調的混醬內，加一個新鮮烤好的芝麻燒餅，飲一杯消滯的山楂茶，人生幾何。
我好喜歡香港，香港有四季，夏天熱到抽筋，冬天突然有幾天又凍到抽筋，大家打開衣櫃可以換吓季，長袖衫換短袖衫，短袖衫又換件羊毛老底，一年就這樣過去。
新加坡友人說在新加坡打開衣櫃很悶，清一色夏天衫，為咗貪靚，佢試過着薄皮褸到的士高，結果生到一頸都係熱痱。