所謂冬大過年，噚日好多打工仔女都趕返屋企做節，連何志平局長都唔例外。雖然區議會委任名單到𠵱家都未公布，老董想委任又唔敢委任，但係何局長都冇佢咁好氣，噚日趁冬至喺民政網站寫咗篇溫馨到暈嘅文，話冬至係一個團圓嘅節日，唔理幾忙都好，都會返屋企同家人食飯過冬，食完飯後再嚟一碗湯丸，甜甜蜜蜜，分甘同味咁話。
八方都冇諗過何局長原來咁感性，佢話做得一家人就係一種難得嘅緣份，最重要係互相支持，守望相助，拉近心靈之間嘅距離。佢又話「冬至一陽生」，冬至提醒我哋，冬天陰氣將盡，春天陽氣就快會嚟。
如果唔係何局長提一提醒，八方差啲都唔記得，香港今年咁多「陰氣」，都似乎由何局長今年大年初二幫香港求咗支下籤開始嚟，既然何局長都領悟咗真諦，唔知出年重會唔會改派利是呢？
傳真︰2623-9278
電郵︰