滙豐（005）果然破頂衝關，突破上周高位120.50元，高收121元，升1.5元。照走勢睇，滙豐已突破長近兩個月之三角形，再起升浪機會甚大。9RSI昨日已突破下降軌，MACD快將發出雙牛買入訊號，到時便可確認整固完成，重踏升軌。
在滙豐同中移動（941）帶動下，恒指收12487，升116點。升市成交並不多，得147億元，藍籌交投更靜，滙豐全日易手股份總值4.5億元，同國壽（2628）之26億成交額一比，有如大象遇恐龍。不過，本周得兩日半市，如此交投已非太差。趙飛雲按計劃在1.41元買入滙豐Call輪9136，暫時只領先一個位。長假前窩輪往往縮溢價，9136亦唔例外，所以昨日升幅未有跟貼正股。但如此一來，9136溢價降至0.99%，槓桿率8.5倍，數據更吸引。
估計滙豐短期內會升至126元才有較大阻力，到時9136溢價若能維持於現水平，輪價將有3成以上升幅。
倉內原有之3隻股份，昨日均有進帳。其中深高速（548）剛升抵2.675元阻力位，今日如不能破關而上，可能要先計數。
趙飛雲周日同老婆拍拖，見到銅鑼灣同尖沙嘴嘅消費場所，到處是內地同胞，自由行嘅威力，喺聖誕新年同農曆年間又會大爆發。一眾零售股及個別酒店股早已因自由行炒起，想追落後，富豪（078）可以留意，從圖表上看，隻股可能已成功尋底。
趙飛雲