廖碧兒獻咗初吻畀林文龍，不過，只係螢幕初吻啫。前晚佢兩個喺機場拍《皆大歡喜》，劇情講述廖碧兒要去留學，林文龍趕去機場送別，兩個難捨難離之下，情深擁抱兼輕輕一吻，氣氛好浪漫。
廖碧兒話呢個係佢螢幕初吻，所以拍之前好緊張，重自爆有請教男友劉愷威，食晒香口膠又帶埋畀林文龍𡁻。咁啱林文龍有啲感冒，廖碧兒話：「我怕佢有SARS呀，希望一take過搞掂啦，如果TomCruise（湯告魯斯）就NG十次都冇問題。」咁即係嫌棄文龍啫。
反而林文龍好淡定，話晒經驗豐富啲，問佢拍咀戲使唔使向未婚妻郭可盈備案，佢話：「呢啲唔係備案，係知會，我有知會。」咁有冇事前準備工夫？林文龍話：「冇，我又唔食煙，只係輕輕touch一下，我都好耐冇拍呢啲戲，上一次喺拍《陀槍師姐》時，同蔡少芬又係咁輕輕touch，不過今次都應該係婚前最後一吻。」當林文龍知道呢個係廖碧兒螢幕初吻時，佢笑住咁話：「死啦，阿愷威會唔會突然出現突擊㗎？」唓！場戲又唔係好激，使唔使監場呀？
林憶蓮日前喺美國康州舉行咗兩場演唱會，請咗好友黃耀明做嘉賓，憶蓮話好欣賞明哥喺音樂上面嘅創意，而明哥又話憶蓮係自己嘅偶像，佢哋都好想出年大家有機會喺唱片方面合作。
明哥今次去到美國，最開心就係可以睇佢細個時嘅偶像SimonandGarfunkel嘅演唱會，明哥重話自己講得一口流利英文，就係因為聽佢哋嘅歌學番嚟。
葉童噚日去咗台灣宣傳，早排佢老公陳國熹俾人影到同梅艷芳助手Marianne喺街頭擁吻、拖手，記者梗係要追問呢件事啦，葉童承認曾經因為咁而同老公嗌交，老公亦同佢保證以後唔會再發生咁嘅事，所以葉童選擇相信老公。其實大部份女人都好似葉童咁，對老公好寬容嘅，不過咁會唔會變咗縱容，就真係佢哋兩個人先知啦！
女子組合2R嘅Race病到聲沙沙，前晚錄影《勁歌金曲》時，佢重好鬼擔心自己把聲唔掂，Race話：「我都唔夠休息，我已經睇咗醫生，重打埋針。」不過佢錄影時，堅持要唱現場，佢話：「我好擔心觀眾睇咗節目，以為我唱得好難聽呀。」既然有病，夾嘴形都可以原諒嘅，又何必勉強唱現場呢？
呂方噚日去港台做訪問，佢話隻新碟應該過咗年就會出，而且對隻碟好有信心，不過佢就話𠵱家啲宣傳手法好勁，乜都要誇，重要靠埋緋聞，記者話佢出碟嘅時候咪搞下緋聞囉，呂方笑住咁話：「你哋有冇好介紹呀，介紹個嚟囉。」呂方咁講唔怕俾鄭裕玲鬧呀？
