舊年部《蜘蛛俠》狂收，淨係喺美國已經收咗超過三十一億港元，所以唔少影迷同漫畫迷對續集《Spider-Man2》好期待，但係要下年七月先有得睇。
雖然呢部號稱製作費高達十五億六千萬港元嘅大製作要遲啲先有得睇，但係我羅拉都可以畀啲精采鏡頭大家過吓癮先。今集嘅台前幕後基本上都係原班人馬，導演森雷美（SamRaimi）、男、女主角杜比麥奎爾（TobeyMaguire）同姬絲頓丹絲（KirstenDunst）都會拍埋第三集。
續集發生喺第一集兩年後，杜比扮嘅蜘蛛俠彼得柏加要面對更多考驗，佢今次嘅大敵係艾佛摩連拿（AlfredMolina）扮演嘅八爪魚博士，比上集嘅綠魔更強。好似正當彼得同瑪莉珍喺餐廳傾偈，瑪莉珍要彼得表白同錫佢，點知佢哋諗住咀之際，突然有一架車飛入嚟，搞到彼得即刻抱起女友凌空彈開，嚇到標晒汗，跟住佢哋就發現原來係八爪魚博士做嘅好事。
之後八爪魚博士重捉到蜘蛛俠，綠魔個仔哈利唔知佢係好友彼得，想手刃仇人，而彼得見到瑪莉珍拖住第二個又心都噏晒，我羅拉都替彼得煩埋一份。