經濟好轉，祖國支援，不過可惜香港人心智成熟，經濟歸經濟，政治還政治，阿董同詩姑，一對男女，民望不升反跌，重係大包尾。又係抵佢死。早嗰輪，董班子見香港人7.1大遊行，面青腳軟，港人要求○七普選特首，林公公話會諮詢民意。點知，後來人大常委會四大惡人出言恐嚇，林公公即時變面，宣布押後諮詢期。
加埋律政司唔告阿松，抬兩隻鬼佬大狀出嚟，話阿松喺行政會議唔申報買車，係想「避免尷尬」，之但係，阿松明明講過，行政會議開會佢唔申報，係當時根本冇醒起過最近自己買咗架新車。既然從冇醒起過，又何來尷尬要避？呢個政府，睇嚟都重係當市民係阿福。
不過，好快就有一個機會，令到香港人再提醒多阿董一次，香港人唔係阿福嘞。就係一月一日元旦大遊行。警方今次精唔敢亂咁估，容乜易估低咗，變咗害多一鑊中聯辦。阿董唔聲唔聲，三個月以來又得罪咗香港人好多鑊，包括何志平遲遲唔敢公布區議會委任名單，因為據說有大量民建聯人馬得到委任，怕一公布，就即時刺激港人元旦街頭見！
如果理直氣壯，又使乜鬼鬼鼠鼠？董班子已經淪為咗民建聯嘅棄婦。民建聯馬力喝一聲：曾鈺成應該留喺行政會議，董班子低頭照辦。曾鈺成話同呢個政府瞓埋一張床，有辱冇榮，好似一條麻甩佬，鬧佢個鄉下婆，話自從娶咗你返屋企，初初諗住旺丁旺財，估唔到你個掃把星，累到我賭親都輸，兼且三頭兩日就一場大病，咁陀衰家，你給我滾！
於是個棄婦就踎喺柴房，以淚洗面，為平息老公怒氣，喺米缸拿一執米，即刻煲番煲靚粥畀個佬下火。嗱，呢一執米，就係現時董班子手上區議會嘅委任名單嘞。又係嘅，人哋民建聯十幾年基業，俾阿董六年玩殘。同床搞嘢，雙雙賴嘢，啲病由自己身上傳染畀老公，係咪應該煲番碗靚粥嚟贖罪呢？
於是民建聯一日兩拒保皇，連大學教育預算案都臨時轉軚唔收貨，董班子都要唾面自乾。唔委任番民建聯入區議會，又有乜選擇？可憐呢個政府，上自煲呔，下至一大批政務官，全部都係殖民地精英BlueBlood，𠵱家要焗住睇土共左仔嘅面色。人哋話明唔會保皇，佢都要死死氣幫人點煙、按摩、搓腳板底。一個政府搞到咁殘，自己都唔尊重自己，又點會奢望民望會升？市民聖誕快樂，董班子繼續孭鑊，特區HappyNewYear，阿董就Oh、Dear！
傳真︰2623-9278
電郵︰