明日對香港廣大機迷係一個大日子，除咗係平安夜，亞洲遊戲展2003更會一連5日喺會展舉行，各位機迷必定已經摩拳擦掌，準備入場大展身手，今年更加入漫畫及玩具等精品展，休息時間都有地方逛。預期今年入場人數會再創新高，想搶先試玩新Game？就等小記幫你諗計。
記者：許福合
日期：12月24（三）至28日（日）
時間：早上10:00至晚上8:00（12月28日下午5:00結束）
地點：灣仔會議展覽中心新翼Hall2
門票：$25（四人套票$80）
《蘋果》讀者着數一覽
1.參加《GT4:Prologue》蘋果盃大賽及《ZGundam》比賽。
2.《蘋果》讀者特別隊優先試玩《GT4》體感車艙，或最新型號試玩車架。
3.近距離跟2R、張敬軒等偶像齊玩PS2最新視像鏡頭遊戲EYETOY。
4.《蘋果》讀者特別隊優先試玩《SIREN》主題鬼屋。
今年《蘋果》將聯同AGS、SCEH合作舉辦兩大「蘋果盃」比賽，分別以PS2兩隻最新人氣Game《GT4：Prologue》同《ZGundam》作賽，勝出者會獲得PS2主機等豐富獎品，《GT4：Prologue》冠軍更可獲得至高榮譽、兼且特別訂製嘅《GT4：Prologue》蘋果盃㖭！參加表格將刊登喺明日同後日嘅《蘋果》副刊，填妥參加表格即可參加，想一展身手兼勁攞豐富禮物，就要昅實呢兩日嘅《蘋果》喇！
今年GameShow頭號必玩，一定非《GT4》莫屬，事關GT之父山內一典先生專程來港，出席今年亞洲遊戲展，更帶來聖誕禮物畀機迷；極可能將價值過百萬港元嘅《GT4》體感車艙搬到香港，讓機迷親身體會片車樂趣。《GT4》體感車艙全球只得兩部，坐喺裏面揸車份外有真實感，《蘋果》讀者更可憑明天Coupon，有機會優先坐上去過吓癮！另外機迷車迷同樣關心嘅《GT4》尖沙嘴賽道，亦有即場示範，想見識喺尖東片車嘅實況，不容錯過。
去GameShow都可以做運動，唔係同你講笑，PS2上最有創意兼健康嘅EYETOY將會正式亮相，喺鏡頭前手舞足蹈，簡直將電視遊戲同運動結合為一，香港機迷更可以親身試玩，只得一個人玩唔夠過癮？《蘋果》讀者只要填妥表格，就有機會喺12月28日同人氣偶像2R及張敬軒一齊玩EYETOY，不過名額只得40個，記住早啲到場報名喇！
今年東京GameShow，SCEH就專登搭咗間木屋出嚟畀人試玩佢隻恐怖大作《SIREN》，搞吓氣氛，正所謂好橋唔怕抄，今次香港GameShow同樣起咗間鬼屋，畀人試玩最新嘅驚慄遊戲，包括近期至Hit嘅《零：紅之蝶》，亦會有首次曝光嘅中文版《SIREN》，喺黑漆漆環境玩，你都咪話唔驚，最搞鬼嘅係會有男鬼女鬼突然撲出嚟嚇你，所以入場人士聽到尖聲怪叫就唔使大驚小怪。咁過癮嘅節目梗預埋你一份，只要剪低12月25日嘅《蘋果》Coupon，即可優先入內試玩。
