臨近年尾，大使真係忙到氣咳，不過，無論點忙，大使都記得今日係冬至，正所謂冬大過年，大使都會返屋企同家人食飯做節。可能平日接觸得太多唔開心嘅個案，睇見咁多晚年孤苦嘅老人家、無依無靠嘅孤兒寡婦，大使就更加體會到，一家人齊齊整整，熱熱鬧鬧咁坐埋食一餐飯，係好難能可貴。
蘋果基金同大使一樣，好關心老弱婦孺嘅需要，所以每年幾個大節，都會特別舉辦應節活動招待佢哋。今年蘋果基金得到好心人贊助，由今日冬至至農曆新年期間，搞咗個大型團年飯活動，招待獨居綜援長者參加。
呢個「馬拉松」式嘅團年飯，一共舉行十七天，橫跨二○○三年至二○○四年度，預計有逾六百人受惠。大使喺呢度，特別多謝呢位匿名善長出錢出力出餐廳，令今次嘅團年飯活動得以順利展開。
呢個團年飯活動嘅宣傳工作啱啱開始，已經得到社會服務機構同團體嘅熱烈反應，𠵱家僅餘少量名額，歡迎各機構組織合資格人士報名參加。查詢請致電暖流熱線：29908688。
暖流熱線
電話：29908688
傳真：23702192
電郵：
網址：