老董上星期係威係勢見六大教派，問佢哋對未來特區施政有何高見。林瑞麟同劉兆佳兩人都有助陣，以示重視，但係先此聲明，意見會聽，到時唔寫入報告唔等於唔接受，只係冇位啫。
點知班宗教人士重醒，冇一個同老董講自由民主，夏其龍神父重一句嘢都冇講過，同阿董講耶穌？六年來都證明嘥氣。天氣咁凍，慳番啖氣暖肚好過。
咁講咗成粒鐘，究竟講咗乜嘢呢？咪講吓教育、遺產稅囉；陳日君最緊張啲窮人生計，天主教香港教區輔理主教湯漢就代表教會反映意見，叫老董唔好咁短視，唔好因為要急於解決財赤，就不理有真正需要嘅窮苦人家，削減綜援。
老董嘅答案都唔使估，咪話財赤同通縮係大問題，要等經濟好轉至搞得掂。咁阿媽係女人係人都知，老董份工真好打。
夏其龍話同老董講，不如做番自己嘢，佢同朱牧師及一班學者搞嘅民主網絡一月三日開集思會，研究吓未來嘅定位，○四快到，都係時候各就各位喇。
（圖）夏其龍上星期同宗教界見老董，夏神父一句嘢都冇講過，費事嘥氣。
傳真︰2623-9278
電郵︰