國企氣勢如虹，多隻H股股價俱創出新高，尤以資源股最勁。上周五，國企指數高收4253，大升216點，10大上升股都係資源股，升幅由10.8%至5.3%不等，兩大重磅股中石化（386）同中石油（857）俱上升7%，第3大成份股中國電信（728）不入10大，升幅3.6%。
上個禮拜，國指表現有如坐過山車，周一高見4540但單日轉向，結果挫到4289收，大跌172點，周三更插到4050才定住，兩日內高低相差490點，但隨後兩日，國企又大幅反彈，周五並重上高位水平。經今次震倉後，國企調整已完成，短期會在4500至4600水平略作整固，之後再上，目標將指向5000。芬佬話到明，國企見平就要買，預計在明年首季，國指起碼會有1成升幅，而個別國企升幅更可能去到4至5成。
基金看好國企，已收集好長時間，近期主力砌兩大，但有消息話好快會郁隻中電信。一個月來，中石油同中石化嘅升幅都好勁，上月21日，中石油低位2.675元，上周五升到3.828元，升幅42.9%；中石化2.125元升到3.0元，升幅41.1%；中電信由2.3元升到2.825元，升幅僅22.8%。
兩大一唞氣，中電信就會接力而上，芬佬睇幾多，一升破幾日前嘅2.925元高位阻力，以量度升幅計，最少可見3.5元。
中電信已通過注資，以460億元人民幣向母公司收購6省市資產，包括安徽、福建、江西、廣西壯族自治區、重慶市及四川省，以03年備考稅後盈利計算，估值為7倍，作價合理，對公司有利，估計會以融資方式支付交易代價，新收購資產每年料可提供多逾20%的盈利貢獻。
受惠收購資產，大行已將中電信04年的盈利預測調升，收入為1250億元人民幣，升45%，每股盈利22.4港仙，升13%，現價PE只係12.5倍。截至11月底，全國電話用戶總數已達5.23億戶，其中固定電話用戶達2.59億戶，比上年底增加4562萬戶，增長之勢比預期為佳，芬佬話佢哋一路以來都低估咗中電信嘅潛力，未來評級將會提升。
郭兆誠